Н.Сац атындағы театрды жаңартуға неліктен 24 млрд теңге бөлінді — Досаев жауабы

АЛМАТЫ. KAZINFORM — Алматы әкімі Ерболат Досаев Әуезов ауданында халықпен кездесті.

Әкім баяндама барысында Н. Сац атындағы балалар мен жасөспірімдерге арналған театрды реконструкциялау жұмыстары наурыз айында басталғанын айтты. Жоба құны — 23,9 млрд теңге. Жаңарту жұмыстарын 2026 жылдың маусым айында аяқтау жоспарланған.

Сондай-ақ сұрақ-жауап сессиясы барысында Ерболат Досаев жобаға неліктен қомақты қаражат бөлінгенін түсіндірді.

— Қала әкімі ретінде жобамен жеке өзім айналыстым. Онда барлық норма сақталған. Ал жоба бағасы мемлекеттік сараптама негізінде белгіленді. Біз бірде-бір жобаны өз қалауымыз бойынша орындамаймыз. Қаладағы бағаларды және тек реконструкция емес, жаңа сахна салынатынын ескерсек, бұл ойға қонымды баға. Егер кім тексергісі келсе, Ішкі мемлекеттік аудит департаменті не басқа жауапты мекемелерге жүгіне аласыздар, — деді ол.

Еске салайық, бұған дейін Н.Сац атындағы театр қалай жаңаратынын жазғанбыз.