«Нұр Отан» ұстаздарды марапаттады
АСТАНА. 3 қазан. ҚазАқпарат - Бүгін «Нұр Отан» ХДП Астана қалалық филиалында алдағы мұғалімдер мерекесіне орай ұстаздарға құрмет көрсету іс-шарасы өтті.
Салтанатты шара барысында «Нұр Отан» партиясының Астана қалалық филиалы төрағасының бірінші орынбасары Қайрат Жаңабергенов елордадағы Ана мен бала ұлттық орталығы, Республикалық балаларды оңалту орталығы, сондай-ақ бірқатар мектеп пен балабақша ұстаздарына алғыс хат тапсырып, ақшалай сыйақылармен марапаттады. «Ұстаз» деген сөздің астарында үлкен мән-мағына бар. Бұл - қастерлі ұғым. «Жақсы мұғалім - мектептің жүрегі» деп Ыбырай Алтынсарин тегіннен-тегін айтпаған ғой. Себебі ұстаз ғана адамға өмір жолын таңдауға көмектесіп, өзінің ішкі қабілетін іске асыруға мүмкіндік береді», - деді өз сөзінде Қ.Жаңабергенов.
