Нұр-Сұлтан Еуразияның астанасына айналды - Армения Президенті
НҰР-СҰЛТАН. ҚазАқпарат - Нұр-Сұлтан Еуразияның астанасына айналды. Бұл туралы бүгін XII Астана экономикалық форумы барысында Армения Президенті Армен Саркисян айтты, деп хабарлайды ҚазАқпарат тілшісі.
«Осы жерге алғаш келгенім есімде. Кішкентай ғана қала болатын. Бұл ұлан-ғайыр орын еді, қала жоқ-тын. Одан кейін арман туып, оны ҚР Тұңғыш Президенті - Елбасы Нұрсұлтан Назарбаев шынайы өмірде жүзеге асырды. Небәрі 20 жылдың ішінде Қазақстан астанасының қалай түрленгенін қараңыздаршы. Бүгін міне, Нұр-Сұлтан деген тамаша қаламыз. Оны Еуразияның астанасы деп айтуға толық негіз бар», - деген А.Саркисян ҚР Тұңғыш Президентіне шынайы ризашылығын білдірді.
Сонымен қатар ол прогрессивті дамуға қатысты ойымен бөлісті.
«Алғашқы локомотивтердің бірі адами капитал саналады. Нұрсұлтан Назарбаев атап өткендей, әлемдегі ең ірі 5 компания минералды ресурстар өндірмейтіндігі белгілі. Бұл компаниялар HighTech пен ІТ-технологиялар, сонымен қатар жасанды интеллект саласында жұмыс істейді. Мұндай түрленудің бірнеше факторы бар. Оның бірі - адами капитал, шығармашылық адамдары. Екінші фактор - төртінші индустриалдық революция. Біз жылдам революция эволюциясына енген сияқтымыз. Бұл өзгерістер 30 жылдан кейін емес, күн сайын орын алады. Біз оған дайын болуымыз қажет», - деді ол.
