23:10, 25 Шілде 2019 | GMT +6
Нұр-Сұлтанда төрт автобустың қозғалыс бағыты уақытша өзгереді
НҰР-СҰЛТАН. ҚазАқпарат - Құрылыс-монтаж жұмыстарының жүргізілуіне байланысты тамыздың 1-і мен 10-ы аралығында елордада Керей-Жәнібек хандар көшесіндегі Мәңгілік Ел даңғылынан бастап Түркістан көшесіне дейінгі учаскеде автокөлік құралдарының қозғалысы шектеледі. Сондай-ақ 4 қалалық маршруттың қозғалыс схемасы уақытша өзгертіледі, деп қала әкімдігінің сайты хабарлайды.
Жұмыстарды жүргізу кезіндегі өзгерістер № 18, 28, 52, 54 автобус маршруттарының қозғалыс схемасына қатысты болады.
Құрылыс-монтаж жұмыстарын Астана қаласының Көлік және жол-көлік инфрақұрылымын дамыту басқармасы Нұр-Сұлтан қаласының ЖП әкімшілік полиция басқармасымен бірлесіп «Астана қаласындағы №1 жоспарлау ауданының инженерлік желілері мен жолдары (№19 көшенің оңтүстігіне қарай)» жобасын іске асыру шеңберінде жүргізеді.
Жолда кептеліс тудырмас үшін елорда тұрғындары мен қонақтарына өз маршруттарын алдын ала жоспарлауға кеңес береміз.