Нұр-Сұлтанда жедел жәрдем шақырту азайды
«Бүгінде елорда коронавирусты жұқтыру әлі де «қызыл аймақта». Эпидемиологиялық ахуалдың біраз жақсаруына қарамастан, вирустың беті қайтпай жатыр. Биылғы 3 қыркүйектегі мәліметке сәйкес, инфекциялық стационарларда 1 484 науқас емделіп жатыр, бұл төсек-орын жүктемесінің 41 пайызы. Қазіргі уақытта науқастардың саны біршама азайды. Егер де тамыз айында ауырып жатқандардың саны 2900-ге дейін жетсе, қазір екі есе аз», - деді Желеухан Прімқұлов онлайн брифингіде.
Оның айтуынша, соңғы аптада жаңа тіркелген жағдайларының саны күніне орта есеппен 470-ті құрайды (тамыздың бірінші онкүндігінде 1300 -ден асқан еді). Өткен тәулікте 384 жаңа жағдай тіркелді.
Сондай-ақ, реанимациялық төсек-орындардың жүктемесі азайды. Бүгін реанимация бөлімшесінде 153 науқас жатыр. Жаз айларында мұндағы науқастардың саны 230 және одан жоғары болатын.
«Алғашқы медициналық-санитариялық көмек ұйымдарындағы мобильді бригадалар мен жедел жәрдем станциясына да жүктеме азайды. Мәселен, егер жазда жедел жәрдемге қоңыраулар саны 4 мыңға жетсе, қазір 2400 болып отыр», - деді басқарма өкілі.