Нұрбек Оралбай мен Қытайдағы қандасымыз әлем чемпионаты финалында алтынға таласады

АСТАНА. ҚазАқпарат - Ташкентте ерлер арасында өтіп жатқан бокстан әлем чемпионатында Нұрбек Оралбай финалға шықты, деп хабарлайды ҚазАқпарат тілшісі.

Нұрбек Оралбай 80 келіге дейінгі салмақта Токио олимпиадасының қола жүлдегері, ресейлік Имам Хатаевпен бокстасты.

Екі раундта басымдық түгелдей Нұрбекте болды. Қорытынды есеп - 4:1.

Осылайша, 80 келіге дейінгі салмақта финалда қос қазақ - Нұрбек Оралбай мен қытайлық Тоқтарбек Таңатхан алтын жүлдені сарапқа салады.

Еске сала кетейік, бұдан бұрын қазақстандық бес боксшының әлем чемпионатының финалына шығу үшін таласатынын жазған болатынбыз.

Сондай-ақ Қазақстан құрамасынан алғашқы болып Санжар Тәшкенбай әлем чемпионатының финалына шықты.

Сонымен бірге Махмұд Сабырхан, Дулат Бекбауов және ұлттық құрама капитаны Асланбек Шымбергенов те - финалда.