Нұрлан Нығматулиннің ұлы Нұржан Нұрлановқа қатысты тергеу жүріп жатыр
АЛМАТЫ. KAZINFORM — Алматы полициясы өзінше билік ету бабы бойынша тергеуді бастаған.
Әлеуметтік желіде «Бәйтерек» холдингінің және «ҚазМұнайГаз-Аэро» ЖШС-ның бұрынғы директоры Нұржан Нұрланов үстінен қылмыстық іс қозғалғаны туралы ақпарат тарады.
Ішкі істер министрлігінің баспасөз қызметі ҚР Қылмыстық кодексінің 389-бабы бойынша тергеу жүріп жатқанын растады.
— Алматы қаласы Полиция департаментінің тергеу басқармасында ҚР ҚК 389-бабы (өзінше билік ету) бойынша сотқа дейінгі тергеу жүріп жатыр. Қазіргі уақытта істің мән-жайларын жан-жақты, толық және объективті зерттеу үшін тергеу әрекеттері жүргізіліп жатыр, — делінген ІІМ жауабында.
Айта кеткен жөн, Нұржан Нұрланов - Қазақстан Республикасының Парламент Мәжілісінің бұрынғы төрағасы Нұрлан Нығматулиннің ұлы.
Бұған дейін Нұрлан Нығматулиннің туған ағасы Арғын Нығматулинге іздеу жарияланды.
ҚР Сыбайлас жемқорлыққа қарсы іс-қимыл агенттігі күдікке ілінген Арғын Нығматулин Қазақстаннан тергеу басталғанға дейін кеткенін хабарлады.
