«Нұрлы жер»: БҚО-да 3 мыңға жуық жер телімі тұрғындарға берілмек
ОРАЛ. ҚазАқпарат - Батыс Қазақстан облысында тұрғын үй салу үшін жер кезегінде 100 914 адам тұр, деп хабарлайды «ҚазАқпарат» тілшісі.
Облыстық жер қатынастары басқармасының басшысы Әлия Мұханбетжанованың өңірлік коммуникациялар қызметі алаңында мәлім еткеніндей, соның 71 005-і Орал қаласының үлесіне тиеді. 2017 жылы облыс аудандарында тұрғын үй құрылысы үшін 594 жер телімі берілді.
Бұдан бөлек «Нұрлы жер» бағдарламасы аясында биыл тұрғын үй салуға 2 816 жер телімін беру көзделуде. Соның ішінде Бөрлі ауданында 1 325, Ақжайықта 218, Жаңақалада 60, Зеленовта 640, Қаратөбеде 60, Сырымда 66, Теректіде 369, Шыңғырлауда 78 жер телімі берілмекші.
Басқармасы басшысы сондай-ақ өңірден кезінде РФ Қорғаныс министрлігінің мемлекеттік ұшу-сынау орталығына ұзақ мерзімді жалға берілген жер теліміне де тоқталды. Ол 1 463,7 мың гектарды құрайды, әскери полигонның ауданы - 1 465,1 мың га.
«Биыл 1995 жылғы 20 қаңтардағы мемлекеттік ұшу-сынау учаскесін пайдалану туралы келісімге өзгерістер мен толықтырулар енгізу туралы хаттама қайта қаралып, соған сәйкес Кіші Боғда кен орнын игеруге қажетті 1 371 га алқап мемлекеттік меншікке қайтарылды. Қазіргі таңда жерді мемлекеттік меншікке қабылдау аяқталды», деді Ә.Мұханбетжанова.
