Нұрсұлтан Назарбаев Солтүстік Корея шиеленісін шешу жолдарын ұсынды
НҰР-СҰЛТАН. ҚазАқпарат – ҚР Тұңғыш Президенті – Елбасы Нұрсұлтан Назарбаев Корея Халықтық-Демократиялық Республикасының ядролық қару шиеленісі туралы пікір білдірді, деп хабарлайды ҚазАқпарат тілшісі.
«Бізді Азия кеңістігіндегі милитаризация үрдісі, атап айтқанда Солтүстік Корея айналасындағы шиеленіс алаңдатады. Мәселенің жалғыз шешімі – БҰҰ Қауіпсіздік Кеңесінің барлық қатысушылары тарапынан Солтүстік Корея қауіпсіздігінің пәрменді кепілдігін жасап шығару деп ойлаймын. Бұл Солтүстік Кореяны ядролық бағдарламасын тоқтата тұру жөніндегі сәйкес уағдаластықты тезірек орнатуға итермелейді», - деді Елбасы Astana club пленарлық отырысының ашылуында.
Оның айтуынша, тағы бір маңызды қадам – Пхеньян мен Сеул арасындағы сенім шаралары каталогын жасау.
«Бұл Корей түбегіндегі жағдайды тұрақтандырар еді. Аталған мәселелерді егжей-тегжейлі талқылау үшін АӨСШК (Азиядағы өзара ықпалдастық және сенім шаралары кеңесі) алаңын пайдалануды ұсынамын», - деді Нұрсұлтан Назарбаев.
Айта кетейік, елордада әлемнің жетекші дипломаттары мен саясаткерлерінің және сарапшыларының басын қосатын «Астана клубының» бесінші отырысы өтуде. Мерейтойлық отырыс тақырыбы «Үлкен Еуразия: жаһандық ынтымақтастықтың жаңа құрылымы жолында» деп аталады. Клубтың сараптамалық талқылауына АҚШ, Қытай және Ресей арасындағы қырғи-қабақтың ушығуы, сауда протекционизмі мен популистік көңіл-күйдің артуы, сондай-ақ Иран мен Солтүстік Корея төңірегінде жаңа шиеленістердің бой көрсетуі мәселелері арқау болмақ.
Бұған дейін Елбасы Еуразия қауіпсіздігі бойынша өзекті мәселелерді атап көрсеткен еді.
