Нұрым Сәлімгереев «Сыр Барысы» атанды
АСТАНА. ҚазАқпарат - Қызылорда қаласындағы «Евразия» спорт кешенінде қазақ күресінен облыстық «Алтын белбеу» сайысы өтіп, Нұрым Сәлімгереев «Сыр барысы» атанды, деп хабарлайды ҚазАқпарат тілшісі.
Облыстық спорт басқармасының баспасөз қызметі мәлім еткендей, биыл тоғызыншы мәрте ұйымдастырылған айтулы бәсеке Астана қаласының 20 жылдығы Қызылорда қаласының 200 жылдығы аясында өткізілді.
Боз кілемдегі балуандар үш кезең бойынша төрт жас деңгейінде сынға түсті. Бірінші кезеңі әр ауылдық аймақтарда наурыз айында өткізіліп, оған 6 839 спортшы қатысты. Екінші кезеңі аудандық, қалалық жарыстар сәуірде ұйымдастырылып, оған 1 511 спортшы бақ сынасса, үшінші кезеңі - облыстық сайысқа 250 балуан бақ сынады. Үш кезең бойынша барлығына 8 600 спортшы сынға түсті.
Түйе балуан сайысына 15 спортшы қатысып, олардың арасында Нұрым Сәлімгереев «Сыр барысы» атанып, «Алтын белбеу» белдігі мен 1 млн 170 мың теңгенің сертификатына ие болды.
Екінші орын алған «Сыр арланы» - қызылордалық Мақсат Исақабыловқа бұйырды. Ол 630 мың теңгемен марапатталды. Ал үшінші орында «Сыр сұңқары» атанған Жасұлан Досымов 360 мың теңгеге иелік етті.
Енді осы жылы Астанада өтетін республикалық «Қазақстан барысы» турнирінде Қызылорда облысының намысын аталған додада бірінші және екінші орын алған Нұрым Сәлімгереев пен Мақсат Исақабылов қорғайтын болады.
