О. Шишигина: 2022 жылғы Олимпиаданың ең қымбат жобасы - шана-бобслей трассасы
АЛМАТЫ. ҚазАқпарат - 2022 жылғы Қысқы Олимпиада Қазақстан үшін алдындағы Ресейде өткен ойындардан арзанырақ түседі. Бұл туралы бүгін Алматыда өткен баспасөз конференциясында ҚР Парламенті Мәжілісінің депутаты, олимпиада чемпионы Ольга Шишигина хабарлады.
«Қысқы Олимпиадаға бірнеше спорт объектісі ғана салынады. Ең қымбаты - шана-бобслей трассасы болмақ. Көптеген маңызды спорттық құрылымдар 2017 жылы Универсиадаға дейін салынады. Ол мұз айдындары, олимпиадалық ауыл», - деді О. Шишигина.
Оның сөзіне қарағанда, барлық спорт нысандары халықаралық стандартқа сай салынады.
Еске сала кетейік, 2 қазанда Норвегия 2022 жылы Ослода қысқы Олимпиада ойындарында өткізуден бас тартқаны белгілі болды. Осылайша 2022 жылғы Олимпиаданы ұйымдастыруда Алматының жалғыз бәсекелесі Бейжің ғана қалды.
