ОҚО-да 7 индустриалдық аймақ табысты жұмыс істеуде - Бейбіт Атамқұлов
ШЫМКЕНТ. ҚазАқпарат - Өсім бойынша ОҚО республикада алдыңғы қатарда. Бұл туралы бүгін Елбасының жүктеген функциялары мен міндеттерінің орындалуы бойынша облыстық мәслихат депутаттарының алдындағы есебінде ОҚО әкімі Бейбіт Атамқұлов мәлім етті.
«Президент Нұрсұлтан Әбішұлы Назарбаевтың тапсырмаларына сәйкес, облысымызда мемлекеттік бағдарламалар нәтижелі іске асырылуда. Өңіріміздің алдағы 5 жылға арналған даму бағдарламасы талқыланып, бекітілді. Бүгінде, облыста 7 индустриалдық аймақ табысты жұмыс істеуде (Шымкент, Кентау, Түркістан, Созақ, Түлкібас, Мақтаарал, Казығұрт). Сонымен қатар, 4 индустриалдық аймақтың инфрақұрылымдарының құрылысы жүргізілуде. Жалпы индустриалдық аймақтарда 52 жоба іске асырылып, 4 025 жұмыс орны құрылды»,-деп тоқталды өңір басшысы.
Атап айтқанда, «Индустриалды-инновациалық даму» бағдарламасы аясында 27 млрд теңгеге 16 жобаны іске қосып, 845 жұмыс орнын құру жоспарланса, жыл басынан 2 жоба іске қосылып, 74 жұмыс орны ашылды.
«Бағдарлама аясында бюджетке түскен салықтардың көлемі өткен жылмен салыстырғанда 804 млн. теңгеге артып, 5,4 млрд теңгені құрады. 6 айда өнеркәсіп кәсіпорындарымен 384 млрд теңгенің өнімі өндіріліп, 5,3% артты. Өсім бойынша облыс республикада алдыңғы қатарда», - деді Б. Атамқұлов.
