ОҚО-да екі бүлдіршін суға батып кетті
ШЫМКЕНТ. ҚазАқпарат - Оңтүстік Қазақстан облысында өткен аптада екі бүлдіршін суға батып кетті. Қайғылы жағдай Түлкібас пен Сарыағаш ауданында болды, деп хабарлайды ҚазАқпарат тілшісі.
Облыстық ТЖД баспасөз қызметінің мәліметінше, Түлкібас ауданына қарасты Жаскешу ауылында 29 мамыр күні ойын баласы ата-анасының назарынан тыс қалған. Сөйтіп байқаусызда ауыл маңындағы арыққа түсіп кеткен. Оны көре салып, ата-анасы мен көршілері құтқаруға тырысады. Алайда ағыстың қаттылығынан бүлдіршін біраз жерге ағып кеткен. Тек келесі күні 17.15-тер шамасында тұрғындар баланың денесін судан шығарып алды.
Екінші жағдай осы жексенбі күні Сарыағаш ауданының Бесқұбыр ауылында орын алды. Онда да 4 жасар бүлдіршін күндізгі сағат 13.30-дар шамасында «Қият» каналына түсіп кеткен. Баланың денесі жарты сағаттан аса уақыттан соң табылды.
Айта кетейік, жыл басынан бері өңірде 19 адам судан ажал құшты. Өкінішке орай, оның 17-сі жас бала болып отыр.
Фото: endlesswaves.net
