ОҚО-да «ЭКСПО» туралы не білеміз?» тақырыбында оқушылар пікір сайысы өтті

ШЫМКЕНТ. ҚазАқпарат - Оңтүстік Қазақстан облысы Отырар ауданына қарасты Темір ауылындағы «Темір» орта мектебінде ел Тәуелсіздігінің 25 жылдығына орай «Экспо» туралы не білеміз?» тақырыбында мектеп оқушыларының пікір-сайысы болып өтті, деп хабарлайды аудан әкімдігінің баспасөз қызметі.

Пікір сайысты ұйымдастырушы Ақмарал Көккөзова арнайы баяндама жасап, тақырыптың мазмұнын ашып берді. Мұнан соң елімізде өтетін «ЭКСПО-2017» көрмесіне байланысты шағын бейнесюджет көрсетіліп, 3 кезеңнен құралған пікір-сайысқа кезек берілді. Аталған шарада пікірлерін ортаға салған оқушылар «ЭКСПО-2017» халықаралық көрмесінің елімізге тигізер пайдасы мен маңызы жөнінде қызу пікір алмасып, келелі ойларын ортаға салды. Пікір-сайысқа арнайы қатысқан аудан әкімінің орынбасары Рыскелді Әліш ұстаздар мен оқушыларды ҚР Тәуелсіздігінің 25 жылдығымен құттықтап, көрменің елімізге ғана емес, ауданымызға үлкен пайдасы тиетіндігін нақты мысалдармен жеткізді. Жиын соңында пікір сайысқа қатысқан ауыл ақсақалдары шәкірттердің талаптарына ризашылықтарын білдіріп, ақ батасын берді. Айта кетейік, келер жылы Астанада мамандандырылған «ЭКСПО-2017» халықаралық көрмесі ұйымдастырылады. Мектеп оқушылары айтулы шара жайында толық білулері үшін ұйымдастырылған пікір-сайыс тағлымды болды.