ОҚО-да «Еңбек күні» мерекесіне арналған салтанатты жиын өтті
ШЫМКЕНТ. ҚазАқпарат - Бүгін ОҚО әкімі Бейбіт Атамқұлов «Еңбек күні» мерекесіне арналған жұмысшылар мен еңбек әулеттерінің облыстық форумына қатысты.
Салтанатты жиында өңір басшысы барша еңбек қызметкерлерін кәсіби мерекемен құттықтап, осы салада ұзақ жылдар тер төккен ардагерлер мен қызметкерлерді марапаттады. 
Бұл күні өз саласында талмай еңбек етіп, өз ісінің білгірі атанған 28 азаматқа «Еңбек ардагері», «Облысқа сіңірген еңбегі үшін» медалі және облыс әкімінің Грамотасы мен Алғыс хаты табысталды. Сондай-ақ, мерекелік жиында «Еңбек жолы» конкурсының жеңімпаздары да құрмет пен қошеметке бөленді. Айта кеткен жөн, биыл Еңбек мерекесін атап өту жыл бойына тойланып, облыста түрлі іс-шаралар мен конкурстар ұйымдастырылуда. 
Еске салайық, Елбасы Н.Назарбаевтың жарлығы бойынша елімізде қыркүйек айының соңғы жексенбісі - «Еңбек күні» мерекесі болып белгіленген. Осыған сәйкес, биыл аталған мейрам республикамызда үшінші рет тойлануда. Бүгінде облыста 9 Социалистік Еңбек Ері, 1 Қазақстанның Еңбек Ері тұрады, деп хабарлайды ОҚО әкімінің баспасөз қызметі.
