ОҚО-да халық көп жиналатын барлық нысандар тексеріледі
ШЫМКЕНТ. ҚазАқпарат - Оңтүстік Қазақстан облысындағы сауда орындары, жеке кәсіпкерлік және білім беру нысандарының өрт қауіпсіздігіне тексеру жұмыстары жүргізілетін болады. Бұл туралы өңірдің төтенше жағдайлар қызметінің басшылығы мәлімдеді, деп хабарлайды ҚазАқпарат тілшісі.
Өңірлік коммуникациялар қызметінде өткен баспасөз жиынында ОҚО Төтенше жағдайлар департаменті бастығының орынбасары Нұрғали Жүнісов тексеру шаралары Ресейдің Кемерова қаласындағы ірі сауда ойын-сауық орталығында орын алған жағдайға байланысты қолға алынып отырғанын атап өтті. Яғни, еліміздің Бас прокуратурасы Ішкі істер министрлігіне 3 ай мерзімінде халық көп шоғырланатын нысандарда төтенше жағдайға қатысты талаптардың сақталуын қадағалап, тексеріс жүргізуді тапсырған. Осы тапсырмаға сәйкес шым қаладағы бірқатар ірі ойын-сауық сауда орындарында тексеру жұмыстарымен қатар өрт-тактикалық оқу-жаттығулары жүргізілген.
«2018 жылдың І тоқсанында кестеге сәйкес халық көп жиналатын нысандарда 5 оқу жаттығу жиыны өткізілді. Оның ішінде «Shymkent Plaza» және «Mega Planet» сауда ойын-сауық орталықтары бар. Ал, өткен жылы осындай 21 іс-шара ұйымдастырылды. Олардың қатарында базарлар да қамтылды», - деді Нұрғали Жүнісов.
Айта кетейік, ОҚО Төтенше жағдайлар департаменті облыс аумағында 13679 жеке кәсіпкерлік нысанды есепке алған. Оның ішінде 1793-і Кәсіпкерлік кодексіне сәйкес жыл сайын тексерілетін тәуекел дәрежесі жоғары топтағы нысандар қатарына кіреді.
