ОҚО-да сот орындаушы қызметіне зейнеткерлер тартылмақ

ШЫМКЕНТ. ҚазАқпарат - Оңтүстік Қазақстан облысында жарты жылда 299 мыңнан астам атқару құжаты болған. Соның ішінде 73 мыңнан астамы ғана орындалған. Яғни, сот орындаушылардың жетіспеуінен әрбір төртінші іс қана нақты шешімін табатынын көрсетіп отыр. Бұл туралы Облыстық Әділет департаментінің 6 ай қорытындысы бойынша өткен жиында айтылды, деп хабарлайды «ҚазАқпарат ХАА тілшісі.

Сала басшыларының сөзіне қарағанда, кезекті қысқартудан кейін мемлекеттік сот орындаушылардың саны 52-і болды. Ал, жеке сот орындаушылар  217-ге жетіп отыр. Олардың әрбірі күніне 4 атқарушы істі орындауы керек. Жүктеменің көптігі мәселенің дер кезінде шешімін табуына кедергісін келтіруде.

«Жеке сот орындаушыларды көбейту жөнінде мәселе көтеріп отырмыз. Қазір бұл жұмысқа ішкі істер органдарынан зейнеткерлікке шыққан кісілерді тарту мәселесін қарастырудамыз. Себебі сот орындаушылар жетіспеуінен бүгінде осы қызметке іріктеу, лицензия беру жұмыстары тоқтаусыз жүріп жатыр. Дегенмен осындай көрсеткішке қарамастан, жыл соңына дейін бүкіл құжаттардың 60 пайызын орындауды көздеп отырмыз» , - дейді Облыстық әділет департаментінің басқарма басшысы Бағдаулет Жұмаханов.