ОҚО-да үш жұп егіздерді өмірге әкелген анаға «Алтын алқа» тапсырылды
ШЫМКЕНТ. ҚазАқпарат - Оңтүстік Қазақстан облысында үш жұп егіздерді өмірге әкелген анаға құрмет көрсетілді. Түлкібас ауданында тұратын Ұлболсын Жасымбековаға аудан әкімі «Алтын алқа» тақты, деп хабарлайды ҚазАқпарат ХАА тілшісі.
Еліміздегі алтын құрсақты аналардың қатарына қосылған келіншектің бұл күнде сегіз перзенті бар. 33 жастағы келіншек егіз алты ұл-қыздан бөлек, тағы екі баланы өмірге әкелген. Сала мамандарының сөзінше, бір ананың үш жұп егіздерді өмірге әкелуі тіпті республика көлемінде де сирек кездеседі екен.
Егіздердің ата-анасы аудандық емханада дәрігер болып еңбек етеді. Жас отбасы 2012 жылы «Дипломмен ауылға» бағдарламасы бойынша тұрғын үймен қамтылған. Алтын құрсақты ананы Түлкібас ауданының әкімі Нұрбол Тұрашбеков қабылдап, салтанатты жағдайда сый-сияпат табыстады. Аудан басшысы «Алтын алқаны» иемденген Ұлболсын Жасымбекованы құттықтай отырып, демографиямызға үлес қосып отырғаны үшін ризашылығын білдірді.
Жас отбасының тұңғыш қыздары Аружан 4-сыныпта оқыса, егіз қыздары Қымбат пен Сымбат 7 жасқа аяқ басты. Одан кейінгі егіздері - Ұлжан мен Ұлпан 5 жастан асты. Ал, Ақарыс атты ұлдары 3 жаста болса, 2015 жылы бұл батырдың ізінен егіз інілері Бекарыс пен Жанарыс есімді балақайлар дүниеге келген. 
