ОҚО тұрғындары Елбасының мақаласын қолдады
ШЫМКЕНТ. ҚазАқпарат - Бүгін Оңтүстік Қазақстан облысының жастары Шымкент қаласындағы Әл-Фараби алаңында «ЭКСПО-2017» халықаралық көрмесі мен Елбасының «Болашаққа бағдар: рухани жаңғыру» мақаласын қолдайтындықтарын білдіріп, флешмоб ұйымдастырды, деп хабарлайды ҚазАқпарат.
Мерекелік шараның ашылуында сөз алған облыс әкімінің орынбасары Бауыржан Жамалов алдағы жазда өткелі отырған мамандандырылған көрменің маңызына тоқталды. Жиналған көпшілікті облысымыздағы дайындық жұмыстарының барысымен таныстырды.
Шараға көрмеге іріктеліп алынған 85 еріктімен қатар ұлттық аспаптар оркестрінен жалпы саны 150 азамат қатысып, жиналғандарға концерттік бағдарламаларын ұсынды.
Бүгінгі шараға жиналғандар сонымен қатар, Ш.Қалдаяқов атындағы облыстық филармонияның ұлт аспаптар оркестрінің бір мезетте орындаған күйін тыңдады.
Облыстық филармонияның домбырашылары бұл флешмобты Елбасы Нұрсұлтан Әбішұлы Назарбаевтың 12 сәуір күні жарияланған «Болашаққа бағдар: рухани жаңғыру» бағдарламалық мақаласына арнап отыр. Олар белгілі композиторлардың күйлері мен халық ішіне кең таралған әуендерді, патриоттық әндерді орындап, тыңдаушыларды өз өнерлерімен думанға бөледі.
Флешмобтың мақсаты - көрмені кеңінен жарнамалап, халық арасында насихаттау және жастарды өз елінің патриотты болуға шақыру.
Бүгінгі таңда облыс көлемінде «ЭКСПО - 2017» халықаралық мамандандырылған көрмесіне дайындық жұмыстары қарқынды жүргізілуде. Үгіт-насихат жұмыстарының нәтижесі де жаман емес. Көрменің жоғары деңгейде өтуіне атсалысатын 100 ерікті де дайындықтарын күн сайын пысықтап жатыр.
Сонымен қатар, «ЭКСПО-2017» халықаралық көрмесіне орай ұйымдастырылған шарада оңтүстікқазақстандық байкерлер жиналған жұртшылыққа өздеріне тән ережелер мен қағидаларды көрсетті.
