Ольга Кабанюк: «Мен Ислам дінін қабылдағаныма өте қуаныштымын»
АСТАНА. 15 тамыз. ҚазАқпарат - Кешегі Қадір түнінде «Әзірет Сұлтан» мешіті елордадағы осы мешітке келіп мұсылманшылықты қабылдаған өзге ұлт өкілдеріне ауызашар ұйымдастырды.
Еске салсақ, исламды қабылдап, Алла бір, Мұхаммед оның елшісі деп куәлік еткен жандардың бәрі - нәзік жандылар. Олардың есімдері - Ольга Кабанюк, Екатерина Чевячина, Ольга Лагутина, Елена Мухатова. «Әзірет Сұлтан» мешітіне келіп тілін кәлимаға келтірген Ольга Кабанюк: «Мен Ислам дінін қабылдағаныма өте қуаныштымын. Қазіргі уақытта исламға қатысты әдебиеттерді көп оқып, білімімді тереңдетудемін. Ендігі парызым - намазды бастау», - деді ағынан жарылып. Осы қыздарға арнап берілген ауызашарда мешіт ұжымы «ислам қарлығаштарына» сый-сияпат үлестірді.
