Олимпиада-2018: 6 мыңнан астам спортшыдан допинг сынамалары алынды
АСТАНА. ҚазАқпарат - Оңтүстік Кореяның Пхенчхан қаласында өтетін XXIII қысқы Олимпиада ойындарын допингтен таза өткізу үшін спортшылардан 14 мыңнан астам сынама алынды, деп хабарлайды ҚазАқпарат.
Халықаралық Олимпиада Комитетінің (ХОК) ресми мәліметінде атап өтілгендей, жарыстарға қатысатын 61 елдің 6 мыңнан астам спортшысынан 14 мыңнан астам сынама алынған.
Аталған дереккөзге сүйенсек, допингке қарсы іс-қимылдың алдын ала шаралары шеңберінде 2017 жылдың сәуір-желтоқсан айларында Ұлттық допингке қарсы күрес ұйымдары (NADO) және Халықаралық қысқы спорт федерациясы Олимпиада ойындарына дейін спортшылардан алынатын сынамалар санын арттырған. Басты мақсат - Пхенчхан Олимпиадасына дейін таза спортшыларды қорғау.
Естеріңізге сала кетейік, Олимпиада ойындары 9-25 ақпан күндері аралығында өтеді. Онда спорттың 15 түрінен 102 медаль жиынтығы сарапқа салынады. Қазақстан спорттың 9 түрінен сынға түседі.
