Олимпиада жүлдегерлері озық университеттердің гранттарын алды

АСТАНА. ҚазАқпарат - XV халықаралық Жəутіков олимпиадасында Астанадағы Республикалық физика-математика мектебінің (РФММ) оқушылары жүлделі болды, деп хабарлайды ҚазАқпарат.

Елордадағы РФММ 10 сынып оқушылары Ардабек Айдын, Əбдіғалиев Жандос математика пəнінен қола, 11 сынып оқушысы Əмірхан Байлин физика пəнінен, 9 сынып оқушысы Рауан Қалдыбаев физика пəнінен қола медальдарға ие болды. Əлемдегі математика марғасқаларының ішінен топ жарып, алтын медальға ие болған 10 сынып оқушысы Санжар Мажит осы жолы да білімділігі мен біліктілігін көрсете білді. Жеңімпаздарға Астана қаласындағы Назарбаев университеті, Алматы қаласындағы Сүлеймен Демирель университеті жəне Мəскеудегі жоғарғы экономика университетінің толық гранттары табысталды.

Айта кетейік, 10 қаңтар күні Алматы қаласындағы Жолдасбеков атындағы студенттер сарайында информатика, математика жəне физика пәндері бойынша XV халықаралық Жəутіков олимпиадасының ашылуы өтті. Онда АҚШ, Армения, Əзербайжан, Болгария, Грузия, Дания, Қырғызстан, Моңғолия, Қазақстан, Түркия, Өзбекстан, Беларусь, Ресей, Румыния, Сербия сынды 18 мемлекеттен 540 білімпаз бақ сынады.