Өнеркәсіптік саясат жөніндегі ведомствоаралық комиссия құрылады - Атамқұлов
НҰР-СҰЛТАН. ҚазАқпарат – Елімізде Өнеркәсіптік саясат жөніндегі ведомствоаралық комиссия құрылады. Бұл туралы ҚР Парламенті Сенатының жалпы отырысында ҚР Индустрия және инфрақұрылымдық даму министрі Бейбіт Атамқұлов айтты, деп хабарлайды ҚазАқпарат тілшісі.
«Бірінші - Өнеркәсіптік саясат жөніндегі ведомствоаралық комиссия құру. Бүгінгі таңда өнеркәсіптік саясатты әртүрлі мемлекеттік органдар іске асырады. Оның тиімді жүргізілуі үйлестірілген іс-қимылдарға байланысты. Сондықтан Премьер-Министрдің орынбасары төрағалық ететін Ведомствоаралық комиссия құрылады, - деді отырыста Өнеркәсіптік саясат туралы» және оған ілеспе заң жобасы туралы баяндама жасаған министр.
Оның атап өтуінше, екіншіден, бизнес проблемаларына уақытылы ден қою үшін Үкіметке ынталандырудың жаңа іс-шараларын бекіту және қолданыстағы іс-шараларды қайта қарау құзыреті беріледі.
«Үшіншіден, Мемлекет басшысының атына енгізілетін Қазақстан Республикасы өнеркәсібінің жай-күйі туралы ұлттық баяндаманы Үкімет қалыптастырады. Ол өнеркәсіптік саясатты жоспарлау мен қалыптастырудың басты құралы болады», - деді Бейбіт Атамқұлов.
