Өнеркәсіп комитетіне бағынысты кәсіпорында 14,2 млн теңге жалақы мен сыйақы заңсыз төленген – аудит
АСТАНА. KAZINFORM – 2024 жылы нақты жұмыс істелмеген уақыт үшін еңбекақы төлеуге байланысты 14,2 млн теңге көлемінде өрескел қаржылық заң бұзу анықталды. Бұл туралы Қаржы министрлігінің Ішкі мемлекеттік аудит комитетінің баспасөз қызметі хабарлады.
2025 жылы азаматтық ұстанымы белсенді азаматтың өтінішінің арқасында Алматы қаласы бойынша Ішкі мемлекеттік аудит департаменті «Қазақстан Республикасы минералдық шикізатын кешенді қайта өңдеу жөніндегі ұлттық орталық» шаруашылық жүргізу құқығындағы РМК-на тексеру жүргізді. Бұл мекеме Индустрия және құрылыс министрлігінің Өнеркәсіп комитетінің ведомстволық бағынысты ұйым.
— Аудит нақты қызметкерлерге жалақы мен сыйақы есептеудің негізділігі мәселелеріне бағытталды. Нәтижелері аса алаңдатарлық болды: 2024 жылы нақты жұмыс істелмеген уақыт үшін еңбекақы төлеуге байланысты 14,2 млн теңге көлемінде өрескел қаржылық заң бұзу анықталды.
Тексерілген бюджеттік қаражат пен активтердің жалпы көлемі 188,9 млн теңге. Еңбекақы төлеудегі заң бұзудан бөлек, аудиторлар 34,4 млн теңге сомасында бірқатар елеулі рәсімдік ауытқуды тіркеді. Олардың қатарында — үш қашықтан жұмыс істейтін қызметкермен еңбек шарттарының болмауы (3,7 млн теңге), үш қызметкерде жұмыс уақытының шекті нормасынан асып кетуі (12,7 млн теңге), сондай-ақ ғылыми-техникалық бағдарлама бойынша конкурстық құжаттаманы әзірлеу қызметтеріне негізсіз шығын (18 млн теңге) бар, — делінген Ішкі мемлекеттік аудит комитеті хабарламасында.
Тексеру нәтижесі бойынша анықталған заңбұзуды жою және кінәлі лауазымды тұлғаларды жауапкершілікке тарту мәселесін қарау туралы нұсқама берілді. Орындау ерекше бақылауға алынған, ал жинақталған материалдар қылмыстық қудалау жөніндегі уәкілетті органдарға берілді.
— Мұндай тексерулер басқарудағы осал тұстарды ғана көрсетіп қоймай, қоғамның мемлекеттік институттарға деген сенімінің негізі ашықтық пен заң талаптарын сақтау екенін еске салады, — деп сарапшылар атап өтеді.
Айта кетелік БҚО-да шенеунік тәртіптік жазасы бола тұра, өзіне 800 мың теңгедей сыйақы тағайындағаны туралы жазған едік.
