Өнеркәсіп пен тұрғын үйлер арасындағы қауіпсіздік аймақтарын белгілеу жеңілдейді

АСТАНА. KAZINFORM — Өнеркәсіптік объектілер үшін санитариялық-қорғау аймақтарын белгілеудің жаңа қағидалары бекітілді, деп хабарлайды Санитариялық-эпидемиологиялық бақылау комитетінің баспасөз қызметі.

Қазақстанда өнеркәсіптік және өндірістік объектілердің санитариялық-қорғау аймақтарын (СҚА) реттеудің жаңа қағидалары қолданысқа енгізіледі. Бұл өзгерістер 2026 жылғы 9 қаңтарда қол қойылған Қазақстан Республикасының Құрылыс кодексінде көзделген.

СҚА — бұл өнеркәсіптік кәсіпорындар мен тұрғын аймақтар арасындағы, адамдарды шу, иіс және өзге де зиянды әсерлерден қорғау үшін қажет арақашықтық.

— Негізгі өзгеріс — СҚА-ны белгілеу тәртібінің жеңілдетілуі. Енді мұндай аймақтар бұрынғыдай екі кезеңде емес, бір кезеңде айқындалатын болады. Жаңа кәсіпорындар үшін СҚА шекаралары жобаны сараптау кезеңінде белгіленеді. Ал қолданыстағы объектілер үшін аймақ шекараларын өзгерту (ұлғайту немесе қысқарту) мәселелері санитариялық-эпидемиологиялық қызмет тарапынан қаралатын болады. СҚА туралы барлық дерек, оның ішінде нақты шекаралары, жергілікті атқарушы органдарға беріліп, ашық кадастрлық картада көрсетіледі. Бұл тұрғын үйлерді, мектептерді, балабақшаларды және өзге де әлеуметтік нысандарды салу кезінде мұндай аймақтарды алдын ала ескеруге мүмкіндік береді, — делінген комитет түсініктемесінде.

Жаңа қағидалар қала құрылысы жоспарлауын неғұрлым ашық етуге және тұрғын үйлердің өнеркәсіптік объектілерге жақын орналастырылу тәуекелдерін азайтуға ықпал етеді.

Өзгерістер 2026 жылғы 1 шілдеден бастап күшіне енеді.

Бұған дейін Қызылордада санитариялық талап сақтамағандарға 22 млн 800 мың теңгеге жуық айыппұл салынғаны белгілі болды.