Өңірде туберкулез дертіне шалдыққандар жыл сайын азайып келеді - БҚО
ОРАЛ. 21 қаңтар. ҚазАқпарат /Елжан Ералы/ - Батыс Қазақстан облысында өткен жылы 536 адам әлеуметтік кесел саналатын туберкулез дертіне шалдықты, бұл алдыңғы жылғыдан 10,1 пайызға аз.
Облыстық статистика департаментінен түскен мәліметке қарағанда, жалпы, бұл көрсеткіш жыл сайын төмендеп келеді. Мәселен, 2006 жылы 1011 адам өкпе дертімен ауырса, 2007 жылы - 946, 2008 жылы - 833, 2009 жылы 596 адам туберкулезбен сырқаттанған болатын.
2010 жылы көбірек таралған өзге жұқпалы дерттерден 61171 жоғары тыныс жолдары жіті жұқпасы, 1059 өткір ішек ауруы, 380 педикулез тіркелді. Сондай-ақ 61 адам сарып дертіне шалдықты. 2009 жылмен салыстырғанда өткір вирусты гепатит 69,2, ротавирусты энтерит 5,2, эхинококкоз 14,6, сарып (бруцеллез) 32,6 пайызға көбейіп кетіп отыр.
