Өңірлік клубтардан әлемдік аренаға дейін: елімізде фулл-контакт каратэ қалай дамып келеді
АСТАНА.KAZINFORM – Қазақстанда фулл-контакт каратэні дамытып жүрген ұйымдардың өзара байланысын бір жүйеге келтіру жұмыстары қолға алынды. Бұл бірлестік жарыстарды өткізу ережелерін үйлестіруге, спортшыларды іріктеу тәртібін ашық әрі түсінікті етуге, сондай-ақ клубтар мен өңірлік құрылымдар арасындағы ынтымақтастықты нығайтуға бағытталған.
2026 жылы Қазақстан Республикасының Ұлттық Олимпиада комитеті Қазақстанның Ұлттық фулл-контакт каратэ қауымдастығын осы спорт түрі бойынша ұлттық федерация ретінде ресми таныды. Қауымдастық Дүниежүзілік фулл-контакт каратэ ұйымының (WFKO) қамқорлығымен дамып келе жатқан, олимпиадалық бағдарламаға кірмейтін Full contact karate спорт түрі бойынша ұлттық федерация мәртебесін алды.
Қауымдастық өкілдерінің айтуынша, ұйымның басты стратегиялық мақсаты қазақстандық спортшылардың Азия ойындары мен Олимпиада ойындарына қатысуына жол ашу. Осы мақсатқа жету үшін ел ішінде фулл-контакт каратэнің дамуына қолдау көрсетіп, оның халықаралық деңгейдегі беделін арттыру көзделіп отыр.
Бағытты дамытудың келесі кезеңінде өңірлік желіні нығайту, ортақ жұмыс тәртібін қалыптастыру және қызметті қолданыстағы заңнама талаптарына сәйкестендіру мәселелеріне басымдық берілмек.
Айта кетейік, спорт саласындағы заңнамалық өзгерістерге сәйкес, 2025 жылғы 16 маусымнан бастап «бір спорт түрі – бір аккредиттеу» қағидаты енгізілді. Оған сай, әр спорт түрі бойынша бір ұлттық федерация аккредиттеліп, жергілікті федерациялар оның құрамына кіруге тиіс.
Осыған байланысты Қазақстанның Ұлттық фулл-контакт каратэ қауымдастығының президенті Болат Бақтаев ұйымдарды біріктіру кезінде олардың тең құқылы қатысуы мен әр мектептің қалыптасқан дәстүріне құрметпен қарау басты назарда болуы керек екенін айтты.
– Бірігу – ортақ ережелер жөнінде келісіп, әр мектептің тарихы мен дәстүрін құрметтей отырып, бір мақсатқа қарай қадам басуға мүмкіндік беретін жол. Бұл бір ұйымның екіншісін өзіне қосып алуын білдірмеуі керек. Шешімдер алқалы түрде қабылданып, жүйе ашық әрі жүйелі жұмыс істегені маңызды, – деді ол.
Ортақ тәсілдерді енгізу спортшыларға жарыстар күнтізбесін жақсы түсінуге және іріктеу талаптарын нақты білуге мүмкіндік береді деп күтіліп отыр. Ал жаттықтырушылар мен клубтар ортақ талаптарды талқылауға қатысып, осы спорт бағытының мүддесін бірлесе қорғауға мүмкіндік алады. Сонымен қатар әр мектептің өзіндік дайындық ерекшеліктері мен қалыптасқан дәстүрлерін сақтау көзделіп отыр.
Оған қоса, ұйымдарды біріктіру үдерісі халықаралық деңгейде де жүріп жатыр. Дүниежүзілік фулл-контакт каратэ ұйымы – WFKO 2019 жылы құрылған. Ұйымның негізгі мақсаттарының қатарында әртүрлі стильдер мен спорттық құрылымдарды біріктіру, ортақ жарыстар өткізу және фулл-контакт каратэнің олимпиадалық спорт түрі ретінде танылуына ықпал ету бар.
2025 жылы WFKO аясында әртүрлі мектептердің өкілдері қатысқан алғашқы әлем чемпионаты өтті. Қазақстанның Ұлттық фулл-контакт каратэ қауымдастығының мәліметінше, бұл бағыттың алдағы дамуы ұйымдардың өңірлердің өкілдігін қамтамасыз ету, өкілеттіктерді бөлу және шешім қабылдау тетіктері жөнінде ортақ келісімге келе алуына байланысты болады.
Дәл осы мәселелердің қалай шешілетіні ортақ қағидаттардың іс жүзінде қаншалықты тиімді жүзеге асатынын айқындайды. Оның нәтижесі спорт клубтарының, жаттықтырушылардың және тиісті ұйымдардың күнделікті жұмысынан көрініс табады.
Айта кетейік, қазақстандық үш каратэші әлемдік рейтингіде көш бастаған еді.
