Оңтүстік Африкада 90 оқушы каннабис қосылған кекс жеп ауруханаға түсті

Оңтүстік Африка Республикасында Pulamadibogo Primary School бастауыш мектебінің 90 оқушысы, болжам бойынша, каннабис қосылған кексті жегеннен кейін ауруханаға түскен. ҚазАқпарат бұл туралы ВВС жаңалықтарына сілтеме жасап хабарлайды.

Ресми дерек бойынша, оқушылар мектепке бара жатқан жолда көшедегі саудагерден кекс сатып алған.

Балалар жүрегі айнып, іші ауырып, құсқысы келгенін айтты, ал үш қыз әлі де ауруханада жатыр.

Полиция екі күдіктіні ұстады, оларға кісі өлтіруге оқталды деген айып тағылды.

Полиция хабарлауынша, 21 және 19 жастағы күдіктілер жұма күні Сошангуведегі сот алдында жауап береді.

Гаутенг провинциясының Білім департаменті мұғалімдер сыныптағы оқушылардың «біртүрлі әрекетін» байқағаннан кейін жедел жәрдем шақырғанын айтты.

«Олардың бәрі жақын маңдағы медицина мекемелеріне жіберілді. 87 бала үйіне қайтарылды, үш оқушы ауруханада қалды, олар әлі ем алып жатыр», — делінген білім департаментінің мәлімдемесінде.

Бұған дейін де «space cookies» (каннабис қосылған печенье) жеген балалар бір уақытта ауруханаға түсіп, Демократия альянсы (DA) көше саудагерлеріне тексерісті күшейтуге шақырған.

Партияның ресми өкілі Хуме Рамулифо да провинция үкіметінен мектептегі қауіпсіздік шараларын күшейтуді талап ететінін мәлім етті.