Оңтүстік Кореяның бұрынғы бірінші ханымы пара алғаны үшін жеті жылға бас бостандығынан айырылды
АСТАНА. KAZINFORM – Сеул соты жұма күні Оңтүстік Кореяның бұрынғы бірінші ханымы Ким Кон Хиді қызметке тағайындау мен іскерлік қызметтер үшін қымбат сыйлықтар алғаны үшін жеті жылға бас бостандығынан айыру жазасына кесті, деп хабарлайды Yonhap ақпарат агенттігі.
Арнайы прокурор Мин Джун Кидің командасы бұрынғы бірінші ханымның жеке мәмілелер жасау үшін бірнеше рет қызметтік жағдайын пайдаланғанын алға тартып, оны 7,5 жылға бас бостандығынан айыру жазасын сұраған болатын.
Тергеу нұсқасы бойынша, Ким Конг Хи 2022 жылдың наурыз-мамыр айлары аралығында құрылыс компаниясының басшысынан 100 млн воннан (шамамен 66 700 доллар) астам бағадағы зергерлік бұйымдарды, соның ішінде Van Cleef & Arpels алқасын алған. Оның орнына бизнесмен күйеу баласының мемлекеттік лауазымға тағайындалуына ықпал етуді сұраған.
Бұдан басқа, тергеушілер 2022 жылдың сәуірінде Ұлттық білім беру комиссиясының бұрынғы басшысы Кимге бұл қызметке тағайындалу үшін алтын тасбақа мүсіншесін бергенін сендіріп отыр.
Ким сонымен қатар 2022 жылдың қыркүйегінде кәсіпкерден Vacheron Constantin сағатын және 2023 жылдың ақпанында бұрынғы прокурор сыйға тартқан делінген әйгілі суретші Ли Уфанның картинасын алды деген күдікке ілінді.
Арнайы прокуратура сондай-ақ Кимді 2022 жылы пастордан 5,4 млн вон тұратын Dior сөмкесін алды деп айыптап отыр.
Осыған дейін прокурорлар Оңтүстік Кореяның бұрынғы президентіне өлім жазасын беруді талап еткенін жаздық.
