Оңтүстік өңірлерде шегіртке қаптап кеткені рас па

АСТАНА.KAZINFORM -  Әлеуметтік желілерде Қазақстанның оңтүстік өңірлерінде шегіртке қаптады деген ақпарат тарады. Алайда бұл мәліметтер шындыққа жанаспайды, деп мәлімдеді Ауыл шаруашылығы министрлігінің ресми өкілі Олжас Тлебалдин. 

Оның айтуынша, азаматтар бұрынғы жылдары түсірілген немесе басқа елдерде түсірілген видеоларды жариялап жатыр. Бұл кадрлар нақты жағдайды бұрмалап көрсетеді. 

— Биыл үйірлі шегірткелер 2,1 млн гектарға дейін жайылуы мүмкін деп болжанған. 20 мамырдағы жағдай бойынша 2,3 млн гектардан астам аумақ зерттеліп, 429 мың гектар жерге химиялық өңдеу жүргізілді. Түркістан және Жамбыл облыстарында мароккалық шегірткеге қарсы өңдеу жұмыстары 95% аяқталды, қазір қосымша тазарту жүргізіліп жатыр. 11 өңірде итальяндық прус пен азиялық шегірткемен күрес жалғасып жатыр. Мониторингке 4600-ден астам маман тартылған. Қорғаныс шараларында заманауи, жоғары тиімді пестицидтер қолданылды, — деді Олжас Тлебалдин.

Сондай-ақ, жұмысқа 443 арнайы техника жұмылдырылды. Өңірлерде облыс әкімдері орынбасарларының басшылығымен жедел штабтар құрылды. Жағдай мемлекеттік инспекция комитетінің тұрақты бақылауында, деп қорытындылады Тілебалдин.

Айта кетелік шегірткемен күреске 7,1 млрд теңге жұмсалатыны туралы жазған едік.