ОПЕК: Қазақстан жаңа міндеттеме бойынша өндірісті жалғастырады
АСТАНА. KAZINFORM – 2023 жылғы 30 қарашада өткен ОПЕК+ 36-шы министрлік кездесуінің қорытындысы бойынша Қазақстан және ОПЕК+ - ке мүше басқа елдер әлемдік мұнай нарығында тұрақтылық пен тепе-теңдікті сақтау үшін 2024 жылғы қаңтардан бастап жаңа ерікті міндеттемелер қабылдады. Бұл туралы Энергетика министрлігінің баспасөз қызметі мәлімдеді.
Қазақстан әрқашан ОПЕК+ қатысушы елдердің бастамаларын қолдады. 2024 жылғы қаңтарда міндеттемелердің асып кетуіне қарамастан, Қазақстан келесі төрт ай ішінде артық өндірісті өтейді. Сонымен қатар 2023 жылғы 4 маусымда өткен ОПЕК+ 35-ші министрлік кездесуінде келісілген өндіру жөніндегі өз міндеттемелерін атқарады.
Сондай-ақ кейбір ОПЕК елдері мен ОПЕК-ке кірмейтін елдер 2023 жылдың сәуірінде қабылдаған қосымша ерікті міндеттемелерді және одан кейінгі 2023 жылдың қарашасында қабылданған 2024 жылғы ақпан мен наурызға арналған келісімдерді орындауды жалғастырады.
