Опырылып түскен жаяу жүргінші жолы WhatsApp-тың көмегімен жөнделді
АСТАНА. ҚазАқпарат - Елорда әкімі Әсет Исекешев өзінің Фейсбуктегі парақшасында Сарыарқа әкімдігі жариялаған ақпаратпен бөлісті, деп хабарлайды ҚазАқпарат.
Жарияланымда Сарыарқа ауданы әкімдігінің маңызды ұстанымы жұмыстарды жедел орындау екендігі аталып өтілген.
Сенбі күні сағат 21-29-да Сарыарқа ауданының тұрғыны аудан әкімінің жеке ұялы телефонына WhatsApp қосымшасы арқылы Оқжетпес пен Жалиль көшелерінің (№20 мектеп аймағы) қиылысындағы жаяу жүргіншілерге арналған асфальт жолдың опырылып түскендігін фотоға түсіріп жіберген.
«Аудан әкімі шұғыл түрде жағдайды бағалап, келеңсіздіктерді жою үшін мамандарды жіберді. Сағат 00-54-те аудан әкімдігінің мамандары астана қалалық автомобиль жолдары басқармасымен бірлесіп, аталған жаяу жүргінші жолының опырылған жерін қалпына келтірді», - деп мәлім етті аудан әкімдігінен.
