Орал қаласына келетін ұшақтар кешігіп жатыр

Бүгін Орал қаласына келетін ұшақтар кешігіп жатыр, деп хабарлайды Kazinform.

«Орал халықаралық әуежайы» ЖШС баспасөз хатшысы Айнагүл Сақпосынованың айтуынша, Атыраудан келетін рейс жергілікті сағат 12.00-де келуі керек еді.

«Қазіргі кезде ұшақ техникалық себептерге байланысты кешігіп жатқанын хабарлады. Шамамен сағат 17.00-де Оралға келуі жоспарланып отыр. Сол секілді алматылық рейс сағат 11.00-дің орнына 13.00-де келетін болды», — дейді А.Сақпосынова.

Еске сала кетейік, бұдан бұрын Орал қаласынан Астанаға қатынайтын ұшақтың ұшпай қалғанын жазған болатынбыз.

Бұл рейс бүгін қатынайтын болды.

«Техникалық себептерге байланысты әуе кемесі ауыстырылды. Кешегі Air Astana-ның ұшағы әзірше жөнделмейді деді. Бүгін Астанадан Fly Arystan-ның ұшағы ұшып келді. Бірақ ішінде Air Astana қызметкерлері қызмет көрсетуде. Енді осы ұшақпен ұшқалы жатырмыз», — деді Салтанат есімді жолаушы.