Орал қаласында рұқсат етілмеген 6 қоқыс үйіндісі анықталды
ОРАЛ. KAZINFORM – Орал қаласында биылғы үш айда табиғатты қорғау бағыты бойынша 1 385 әкімшілік құқық бұзушылық дерегі тіркелді.
Орал қаласы полиция басқармасы бастығының орынбасары, полиция подполковнигі Жантемір Иманалиевтің өңірлік коммуникациялар қызметі алаңында өткен брифингте мәлім еткеніндей, соның ішінде қалалар мен елді мекендердің аумағын абаттандыру ережелерін бұзғаны үшін, сондай-ақ инфрақұрылым нысандарын бұзу, оларды жою және елді мекендердің жасыл екпелеріне зиян келтіру бойынша ҚР Әкімшілік құқық бұзушылық кодексінің 505-бабына сәйкес 817 құқық бұзушылық анықталып, 979 ескерту жасалды.
Сондай-ақ кодекстің 434-2-бабына (қоғамдық пайдалану орындарын ластау) сәйкес 554 құқық бұзушылық белгілі болды.
Оның сөзіне қарағанда, тұрғын үй-коммуналдық шаруашылық мекемесімен бірлесіп рұқсат етілмеген 6 қоқыс үйіндісі анықталды.
Сол секілді биыл БҚО полиция департаменті табиғатты қорғау полициясы бөлімімен бірлескен жұмыс нәтижесінде Орал қаласы аумағында заңсыз құм өндіру дерегі жөнінде қатынасхат БҚО жер ресурстары департаментіне жолданған.
- Орал қаласы полиция басқармасы табиғатты қорғау полициясы бөлімшесінің қызметкерлері Instagram әлеуметтік желісінде «Таза Қазақстан» акциясы жөнінде, қаланы абаттандыру және сауда қағидаларын сақтау бағытында түсіндіру жұмыстарын жүргізді. Заңнама бұзғандарға 7 млн 195,560 мың теңге әкімшілік айыппұл салынып, соның 6 млн теңгеге жуығы өндіріліп алынды, - деді Ж.Иманалиев.
Орал қаласы әкімінің орынбасары Жандос Дүйсенғалиевтің мәлімдеуінше, шаһарда 29 наурыз – 26 сәуір аралығында санитарлық-экологиялық айлық жарияланды. 29 наурыз күнгі алғашқы сенбілікке 1 мыңнан астам адам қатысып, қаладан 400 тонна қоқыс шығарылды.
Оның айтуынша, 5 және 26 сәуірде өтетін сенбіліктерде тал-терек отырғызылып, ағаш діңгектері әктеліп, скверлер қалпына келтіріледі. Қаладағы 57 сквер мен тынымбаққа департаменттер мен басқармалар жауапты болып бекітілді. Әр басқарма өзіне қарасты аумақты абаттандырады. 19 сәуір күні «Таза жағалау» іс-шарасы барысында өзен жағалаулары тазартылады.
- Санитарлық-экологиялық айлық кезінде сенбі күндері Орал-Саратов тас жолы бойындағы және Асан ауылы маңындағы полигондар тұрғындардан күл-қоқысты тегін қабылдайды. Қаланы күтіп-ұстауды «Жайық таза қала» ЖШС қамтамасыз етеді. Ал ірі габаритті қалдықтарды шығарумен «Строй компас» және «Жайық таза қала» ЖШС айналысады. Биыл жергілікті бюджет есебінен 1 мың дана еуроконтейнер алынып, қатты тұрмыстық қалдықтарға арналған жаңадан 80-ге жуық алаң жасалатын болады, - деді Ж.Дүйсенғалиев.
Еске сала кетейік, бұдан бұрын Оралда былтыр жөнделген жолдың опырылып қалуына байланысты әкімдік жауап бергенін жазған едік.
