Оралда Азиада алауын алып жүрушілердің бірі - «Азиада алауы» әнұранының авторы Е.Хасанғалиев

ОРАЛ. 15 қаңтар. ҚазАқпарат /Елжан Ералы/ - 18 қаңтарда еліміздің батыс қақпасы - Орал қаласында қысқы Азия ойындарының алауын салтанатпен алып жүру рәсімі өткізілмек.

Осыған орай алаугерлердің қатысуымен дайындық тағы бір пысықталды. Оралда аталмыш салтанат екі кезеңмен ұйымдастырылмақ. Жеңіс алаңынан Мәншүк Мәметова алаңына дейін, одан алау мұз спорты сарайына дейін жеткізілмек. Осында салтанат мерекелік концертке ұласпақ.

Алаугерлер қатарында облыс басшыларынан бастап спорт саласының ардагерлері, мәдениет және өнер қайраткерлері, атақты спортшы-жастар да бар. Батысқазақстандықтар Астана мен Алматыда өткізілетін қысқы Азия ойындарының «Азиада алауы» әнұранын (сөзін жазған белгілі ақын Өтеген Оралбаев) жерлестері, танымал композитор, Қазақстан халық әртісі Ескендір Хасанғалиев шығарғанын мақтан етеді. Алау ұстаушылардың бірі де - осы Е.Хасанғалиев. Ақ Жайық аспанында «Азиада алауы» әнұраны қалықтайтын болады.

Осы күндері өңірде Азиадаға арналған түрлі шаралар ұйымдастырылуда.