Оралда бір күнде екі сауда үйінде өрт шықты
ОРАЛ. ҚазАқпарат – Оралда бір күнде екі сауда үйінде өрт шықты, деп хабарлайды ҚазАқпарат тілшісі.
БҚО ТЖ департаментінің баспасөз қызметі мәлім еткендей, оқиға 15 маусым күні сағат 18.12-де Құрманғазы көшесі, 152-мекенжайында 9 қабатты үйде орналасқан «Школьник» сауда үйінде болды.
Сауда үйінің бірінші қабатындағы қосалқы ғимаратта электр қалқандағы кабельдер (3 шаршы метр) жанды.
Баспалдақ сатысымен 24 адам эвакуацияланды, оның төртеуі – балалар.
Зардап шеккендер жоқ.
Тілсіз жау ТЖ департаментінің күшімен (35 адам, 11 техника) сағат 19.00-де толықтай жойылды.
Тағы бір осындай оқиға Д.Нұрпейісова көшесі 17/1-мекенжайында орналасқан 2 қабатты «Атриум» сауда үйінде (жалпы ауданы 9358,9 шаршы метр) тіркелді.
Екінші қабатта сағат 15.06-да электр қалқаны мен кабельдер (мұның да аумағы 3 шаршы метр) өртенді.
Сауда үйінің қызметкерлері мен келушілер өздері шығып үлгерген.
Өрт ТЖ департаментінің күшімен (59 қызметкер, 19 техника) сағат 16.07-де сөндірілді.
Қазіргі кезде өрттердің шығу себебі, келтірілген шығын анықталу үстінде.
Еске сала кетейік, бұдан бұрын Оралда полицейлер аударылған автокөліктен үш адамды шығарып үлгергенін , автокөліктін мотоциклмен жүрген екі жасөспірімді қағып кеткенін жазған болатынбыз.
