Оралда кәсіпорынға 11 млн. астам теңге залал келтірген азамат сотталды

ОРАЛ. Шілденің 12-сі. ҚазАқпарат /Елжан Ералы/ - БҚО бойынша экономикалық қылмысқа және сыбайлас жемқорлыққа қарсы күрес департаменті Ерлан Әбуевке қатысты қылмыстық істі аяғына дейін жеткізді.

Департаменттің баспасөз қызметінен ҚазАқпарат тілшісіне хабарлағанындай, аталған азамат 2008 жылғы шілдеде, тергеу барысында анықталмаған тұлғалармен қылмыстық ымыраласуға келіп, «Ақтөбе-Әлем» ЖСШ-нің тіркеу құжаттарының көшірмелерін иемденіп алған. Кейін өзін аталмыш ЖШС-нің директоры деп таныстырып, Атырау қаласындағы «КФ Титан Металл» ЖШС -нің өкіліне металл жаймаларын алу жөнінде «Ақтөбе-Әлем» ЖСШ-нің атынан өтінім берген. Ұсынылған құжаттардың негізінде металл жаймаларын жеткізу жөнінде келісім жасалып, Е.Әбуев Орал қаласындағы «КФ Титан Металл» ЖШС-не келіп, қоймадан жалпы сомасы 11 млн. теңгеден астам 61 370 кг. металл жаймаларын алған. Бұдан соң металл жаймаларын Атырау қаласына шығарып, қылмыс жасаған орнынан бой тасалаған. Е.Әбуевтің қылмыстық іс-әрекетінің нәтижесінде «КФ Титан Металл» ЖШС-ге көрсетілген сомаға материалдық шығын келтірілген.

Орал қалалық соты Е.Әбуевті ҚР ҚК 177-бабы 3-бөлімі «б» тармағы бойынша кінәлі деп танып, шартты түрде 5 жылға бас бостандығынан айыруға, 3 жыл сынау мерзімін белгілеуге үкім етті.

5,5 млн. теңгенің мүлкін тұтқындау жолымен келтірілген шығын ішінара өндіріліп алынды.