Оралда қос бірдей саябақ абаттандырылмақ

ОРАЛ. ҚазАқпарат - Орал қаласында 166 млн. теңгеге қос бірдей саябақ абаттандырылмақ, деп хабарлайды «ҚазАқпарат» ХАА тілшісі.

Орал қаласы әкімінің баспасөз қызметінен түскен мәліметке қарағанда, биыл 4-інші және 6-шағынаудандар аралығындағы жаяу адамдар жүретін бульварды абаттандыруға 113 млн. теңге бөлініп отыр. Сондай-ақ облыстық аурухана маңында А.Пушкин мүсіні тұрған шағын саябақты ретке келтіруге 53 млн. теңге қаралған. Осы қаржыға шағын мүсіндер қойылып, жарықтандыру жұмыстары жүргізілмек, сондай-ақ жаяу жүргіншілер жолдарына өрнектастар төселеді.

Айта кетейік, қалада барлығы 54 саябақ (сквер) пен алаңдар бар болса, соның 31-і абаттандырылған. 1833 жылы Оралда үш күн аялдаған орыстың ұлы ақыны Александр Пушкинге аталған мүсіннен басқа Пугачев алаңында еңселі ескерткіш орнатылған.