Оралда Мемлекеттік Ту көтеріліп, Республика күні аталып өтті
Орал қаласында Мемлекеттік Ту көтеріліп, Республика күні аталып өтті, деп хабарлайды Kazinform.
Алдымен Тұңғыш Президент алаңында Мемлекеттік Ту көтеріліп, Мемлекеттік Гимн орындалды.
Ту көтеру салтанатына облыс әкімі Нариман Төреғалиев бастаған өңір жұртшылығы қатысты.
Содан кейін «Атамекен» өнер ордасында «Мәңгі жаса, қыран елім – Қазақстаным!» атты мерекелік іс-шара өткізілді.
Облыс әкімі Нариман Төреғалиев құттықтау сөзінде Республика күнінің мән-маңызына тоқталды.
«Республика күніне орай өткен салтанатты жиында Қазақстан Президенті Қасым-Жомарт Кемелұлы Тоқаев «Бұл – қазақтың мемлекеттілік дәстүрі қайта жаңғырған тарихи күн. Көк түріктер дәуірінен, Алтын Орда, Қазақ хандығы заманынан келе жатқан елдігіміз тамырын тапқан күн. Бұл – Алаш арыстарының азаттық жолындағы арпалысы ақталған күн» деп ерекше баға берді. Республика күні – елдігімізді нығайтатын, бірлігімізді бекемдеп, ынтымағымызды арттыратын айшықты мереке. Бұл жай ғана мереке емес, бұл – біздің халқымыздың мемлекеттілігімізді сақтауға және нығайтуға, Әділетті Қазақстан құруға деген ұмтылысы. Барша қазақстандықтар белсене атсалысқанда ғана осы игі мақсатқа қол жеткізе аламыз. Себебі мемлекеттің тірегі де, басты байлығы да – ел азаматтары!» деді өңір басшысы.
Салтанатты жиын барысында 70-ке жуық адамға мемлекеттік награда тапсырылды. Онда еңбек ардагерлері, мәдениет, ауыл шаруашылығы қызметкерлеріне басымдық берілді.
Мерекелік іс-шара концерттік бағдарламаға ұласты.
Республика күніне арналған мерекелік іс-шаралар облыстың барлық ауданында ұйымдастырылды.
