Оралда шыбын-шіркеймен күреске 93 млн теңге бөлінді
БҚО энергетика және тұрғын үй-коммуналдық шаруашылық басқармасы басшысының орынбасары Миржан Нұртазиевтің өңірлік коммуникациялар қызметі алаңында өткен брифингіде мәлім еткеніндей, 2021-2023 жылдары Орал мен қала аумағында профилактикалық дезинсекция жүргізуге конкурстық рәсімдердің қорытындысы бойынша «Магтоксин» ЖШС-мен 291,2 млн теңгеге келісім-шарт жасалған.
Оның сөзіне қарағанда, биыл шыбын-шіркеймен күрес шаралары 93 306,0 мың теңгеге екі кезеңде жүргізілмек.
Дернәсілдерге қарсы шаһар мен қала маңындағы елді мекендерде 2 мың га аумақ аспалы бүріккіштермен өңделеді.
«Бірінші кезең сәуірде басталып, мамыр айының ортасына дейін жалғасады. Содан кейін масалар қанаттанған кезде өңдеу жұмыстары 11 мың гектар аумақты қамтиды. Бұл жұмыстар күн батқаннан таңға дейін жүргізіледі. Биылғы іс-шаралар барысы күнбе-күн қоғамдық кеңес мүшелерін, депутаттарды қатыстыра отырып, бақыланатын болады. Егер жұмыстың тиімділік көрсеткіші қанағаттанарлық болмаса, ол жер өнім беруші есебінен қайтадан өңделеді», деді М.Нұртазиев.
«Магтоксин» ЖШС өкілі Данияр Базарбаевтың айтуынша, шаһар мен қала маңында жыл сайын дерлік Жайық, Шаған және басқа өзен-сулардағы тасқын салдарынан шыбын-шіркеймен қолайсыз жағдай қалыптасады. Тұрғындардан да жиі шағым түседі.
«Шыбын-шіркеймен күрес қымбат және көп уақытты қажет ететін жұмыс болғанымен, биыл да тиісті іс-шаралар атқарылады», деді Д.Базарбаев.