Оралда су қоймасында қайық аударылып, жас жігіт көз жұмды
ОРАЛ. ҚазАқпарат – Орал қаласында су қоймасында қайық аударылып, жас жігіт көз жұмды, деп хабарлайды ҚазАқпарат тілшісі.
БҚО ТЖ департаментінің баспасөз қызметінен мәлім еткеніндей, оқиға 6 тамыз күні Желаев кентінде «Арна» демалыс аймағында болған.
«Карьер» су қоймасында 6 тамыз күні сағат 19.15-тен бастап жас жігітті іздестіру жұмыстары жүргізілді. Ол қайықпен серуендеу кезінде суға батып кеткен. Достарымен бірге демалған жігіт ішімдік ішпеген. Іздестіру жұмыстары 7 тамыз күні таңғы сағат 07.00-де қайта жалғасты. 20 жастағы жігіттің денесі сағат 09.12-де табылып, судан шығарылды», - деп хабарлады ведомстводан.
Осылайша, демалыс күндері өңірде 5 адам суға кетсе, соның үшеуі – жасөспірім.
Облыста аптап ыстықтың жалғасуына байланысты БҚО ТЖ департаменті тұрғындарға судағы қауіпсіздік ережелерін сақтап, балаларды қараусыз қалдырмау керегін еске салады.
Еске сала кетейік, бұдан бұрын БҚО-да тағы 2 жасөспірімнің суға батып кеткенін жазған болатынбыз.
