Оралда жаңажылдық шыршаға 180 бала жиналды
Облыс аудандары мен Орал қаласынан жетім, ата-ана қамқорлығынсыз қалған, аз қамтылған және көп балалы отбасыдан шыққан, сондай-ақ оқу мен өнерде, спорт саласында табысқа жеткен 9-13 жас аралығындағы жеткіншектер ерекше сәнмен, ертегі кейіпкерлері болып киініп келді. Мерекелік көңіл-күймен олар Елбасы Нұрсұлтан Назарбаевтың құттықтауын LED экран арқылы тыңдады.
Балаларды жаңажылдық мерекемен облыс әкімі Алтай Көлгінов құттықтап, Мемлекет басшысының құттықтау жеделхатын оқып берді. «Жаңа жылда армандар орындалсын. Ол үшін үздік оқып, ата-ана мен мұғалімдер үмітін ақтай білу керек. Ең бастысы, жалқаулыққа бой алдырмай, арман жолында алға баса беріңдер!», деді өңір басшысы.
Жаңашылдық шыршада Аяз ата мен Ақшақардың, ертегі кейіпкерлерінің қатысуымен театрландырылған көріністер қойылды. Ән мен биге де молынан кезек берілді.
Балалардың әрқайсысына 86 мың теңгенің сыйлығы табыс етілді. Бұл шырша тойын өткізуге 17 млн жуық теңге жұмсалды.
Жаңажылдық шыршаға қатысушылар «Айдана» мейрамханасында түстік ішіп, «Funky town» орталығындағы аттрациондарды тамашалап, дискотекаға да қатысты.
