Оралда жатақханадағы өрттен 45 адам эвакуацияланып, 5 адам ауруханаға жеткізілді
ОРАЛ. ҚазАқпарат – Оралда тоғыз қабатты жатақханадағыөрттен 45 адам эвакуацияланып, 5 адам ауруханаға жеткізілді, деп хабарлайды ҚазАқпарат тілшісі.
БҚО ТЖ департаменті мемлекеттік өрт бақылау басқармасының аға инженері Сағдат Әнестің мәлім еткеніндей, оқиға 27 желтоқсан күні шамамен сағат 17.18-де Құрманғазы көшесі 165-мекенжайында болды.
Тоғыз қабатты жатақханада аумағы 20 шаршы метрді қамтыған №62 бөлме жанып кетті.
«Тілсіз жау» 17.47-де оқшауланып, 18.26-да ауыздықталды.
Өрт орнынан үш адам құтқарылды. Оның екеуі құтқару арқанымен, біреуі сатымен түсірілді. 45 адам қауіпсіз жерге шығарылса, соның 18-і – балалар.
Газдан уланды деген күдікпен 9 адам оқиға орнында қаралды. Соның бесеуі ауруханаға жатқызылса, оның ішінде екеуі - бала.
Қазіргі кезде өрттің шығу себебі анықталу үстінде.
Өртті сөндіруге департаменттің жеке құрамы (31 адам, 10 техника) жұмылдырылды. Полиция департаментінен 15 қызметкер, 5 техника жетті.
Еске сала кетейік, бұдан бұрын Батыс Қазақстанда шетел азаматы жүк көлігімен трассада қалып қойғанын, ауа райының нашарлауына байланысты жол жабылғанын жазған
болатынбыз.
Сондай-ақ бүгін тағы бір жол жабылды.
