Оралдағы өрттен бір адам көз жұмды
ОРАЛ. ҚазАқпарат - Бүгін Оралдағы тоғыз қабатты тұрғын үйде өрт болып, бір адам көз жұмды, деп хабарлайды «ҚазАқпарат» тілшісі.
БҚО ТЖ департаментінің баспасөз қызметінен алынған мәліметке қарағанда, Д.Қонаев шағынауданы 68-үйдің 17-пәтерінде (5-қабат) өрт болғаны жөнінде хабар сағат 08.27-де түскен.
Оқиға орнынан 50 адам көшірілсе, соның 10-ы - балалар. Құтқарылған 17 адамның үшеуі - балалар.
Аумағы 25 шаршы метрді қамтыған өрттің 09.29-да беті қайтып, 11.11-де толықтай сөндірілген. Оқиға орын алған №17 пәтерден 1933 жылғы зейнеткер әйелдің мүрдесі табылған.
Өрттің себеп-салдары, келтірілген шығын анықталу үстінде.
