Ордабасы ауданында Арыс-Шымкент бағытындағы көпірді су шайып кетті
ОРДАБАСЫ. ҚазАқпарат – Түркістан облысы, Ордабасы ауданы аумағында Арыс-Шымкент бағытындағы көпірді су шайып кетті. Бұл туралы Арыс қаласының әкімдігі ресми түрде хабарлап, жүргізушілерге бұл жолдың жабылғанын ескертті, деп хабарлайды ҚазАқпарат тілшісі.
«Арыс қаласы мен көршілес Ордабасы ауданы Қараспан (Обручевка) ауылындағы Бадам өзенінің үстінен салынған уақытша көпірді су басты. Арыс-Шымкент бағытындағы жолдың үстіндегі көпірді су басуынан барлық көлік қозғалысы шектелді. Аталған себептерге байланысты Арыс-Шымкент бағытындағы көліктердің өту мүмкіндігі жоқ екендігін назарларыңызға жеткіземіз. Шымкент қаласына шұғыл түрде баратын арнайы рұқсаты бар көлік жүргізушілерінің назарына, Монтайтас-Бадам-Шымкент бағытымен жүру ұсынылады», делінген Арыс қаласы әкімінің хабарламасында.
Айта кетейік, күні кеше қатты нөсер жауыннан Қасқасу өзені арнасынан асып кеткен болатын. Салдарынан Төлеби ауданындағы 4 көпірді де су шайып, Жоғары Қасқасу ауылының ішкі жолдары жабылып қалған еді.
