Орталық Калифорнияда орман өрті күшейіп тұр
Қазір өрт жайлаған аумақ 7500 гектардан асқан.
Штат губернаторы Джерри Браун зардап шеккен аймақта төтенше жағдай режимі енгізілгенін хабарлады. Орман өрті жүздеген құрылысты жойған. Тағы 1500-ге жуық үй мен құрылыс кешендеріне қауіп төніп тұр.
Өрт өткен бейсенбіде Бейкерсфилд қаласының солтүстік-шығысындағы тауларда шыққан. Жақын орналасқан елді мекендердің жүздеген тұрғындары көшірілген. Алдағы уақытта Лейк-Изабелла елді мекенінен 3 мың тұрғын көшірілетіні айтылуда.
Аймақтың ауа райы соңғы күндері қатты ысып, құрғаған. Жұма күні ауа температурасы Цельсий бойынша 32 градустан асқан.
Маусымда АҚШ-тың оңтүстік-батысында ауа райы қатты ысып, соның салдарынан көптеген штаттарда ормандардан өрт шыққан. Ең үлкен өрт Нью-Мексико штатында Альбукерке қаласының оңтүстік-шығысында орын алған. Оның салдарынан 20-дан астам үй жанып, көптеген отбасылар көшірілген.
Өткен аптада Калифорнияның оңтүстігінде өрт шығып, Санта-Барбара ауданындағы үйлер мен Лос-Анджелестің солтүстігіне қауіп төндірді.