Орынборда өтіп жатқан қазақ күресінен әлем чемпионатында қазақстандық бес палуан жеңімпаз атанды
АСТАНА. ҚазАқпарат - Ресейдің Орынбор қаласында өтіп жатқан қазақ күресінен әлем чемпионатында қазақстандықтар бес алтынды еншіледі.
Атап айтқанда, бұл дүбірлі додада «Қазақстан барысы» титулының иегері және әлем чемпионы Мұхит Тұрсынов абсолютті салмақ дәрежесінде жеңіске жетті. Қазақстан құрамасының көшбасшыларының бірі германиялық Лезик Варбицкистен басым түсті. Екінші жекпе-жегінде ол қырғызстандық Тілек Құраловты жеңді, ал жартылай финалда армяндық Артем Григоряннан мерейі үстем болды. Финалдық жекпе-жектің негізгі уақытында жеңімпаз анықталмаса да, белбеулік күресте Мұхит тәжікстандық палуан Комроншах Усторипионнан күшінің нық екенін байқатты, сөйтіп, ол әлем чемпионы атанды. Айта кетейік, осы уақытқа дейін бұл әлем чемпионатында Қазақстан қоржынына палуандар Айдос Сейпілұлы (55 келіге дейінгі салмақ дәрежесінде), Ғани Келдіқұлов (60 келі), Ғалымжан Әбдірахманов (70 келі), Тоқтар Қаркәтенов (80 келі) және Айбек Нұғымаров (90 келіден артық) алтын жүлде салды, деп хабарлайды Vesti.kz.
Естеріңізге сала кетейік, 5-7 желтоқсан аралығында Орынбор қаласында қазақ күресінен V әлем чемпионаты өтіп жатыр. Қазақ күресінен байрағын желбіреткелі жатқан бесінші әлем чемпионатына Қазақстан құрамасынан өзге Австрия, Венгрия, Германия, Грекия, Үндістан, Иран, Испания, Италия, Қытай, Латвия, Литва, Моңғолия, Ресей, Түркия, Франция, Финляндия, Швеция, Эстония және басқа да елдердің палуандары қатысуда.
