ОСК Сыртқы істер министрлігіне халықаралық байқаушылар институтын ашу туралы хат жолдамақ

АСТАНА. 16 қараша. ҚазАқпарат /Айдар Оспаналиев/ - Сайлау учаскелерінің шекаралары туралы ақпарат пен учаскелік сайлау комиссияларының құрамы бұқаралық ақпарат құралдарында 23-ші қарашадан кешіктірілмей жариялануы тиіс. Бұл туралы бүгін 5-ші сайланатын Парламент Мәжілісі депутаттарының кезектен тыс сайлауына байланысты журналистермен болған брифингте Орталық сайлау комиссиясының төрағасы Қуандық Тұрғанқұлов мәлім етті.

Оның сөзіне қарағанда, мәслихат депутаттарын сайлау бойынша, сайлау округтерінің тізімі, олардың шекаралары мен орналасқан жері, аумақтық және округтік сайлау комиссияларының құрамы бұқаралық ақпарат құралдарында 26-шы қарашадан кешіктірілмей жариялануы тиіс. «Сондай-ақ жақын арада біз Сыртқы істер министрлігіне халықаралық байқаушылар институтын ашу туралы хат жолдайтын боламыз»,-деді ОСК төрағасы.