Өскемен – Семей тасжолы жөнделіп жатыр
АСТАНА. KAZINFORM – Абай облысында республикалық маңызы бар Өскемен – Семей автожолының 147–198 шақырым аралығында орташа жөндеу жұмыстары жүргізілуде.
Жалпы ұзындығы 51 шақырымды қамтитын жоба аясында жолдың бірқатар учаскесінде жаңарту жұмыстары атқарылған.
– Қазіргі таңда 43,4 шақырымда асфальтбетон жамылғысы жонылып, 43 шақырымға ірі түйіршікті асфальтбетон төселді. Жөндеу жұмыстары белгіленген кестеге сәйкес жалғасып жатыр, – делінген «ҚазАвтоЖол» ұлттық компаниясының хабарламасында.
Жол-құрылыс жұмыстарына 23 арнайы техника тартылған. Қазіргі уақытта жол жамылғысын жаңарту жұмыстары қарқынды жүргізіліп жатыр.
Аталған жоба өңірдегі көлік қатынасының сапасын арттырып, жол қозғалысы қауіпсіздігін қамтамасыз етуге бағытталған.
Айта кетейік, Қазақстан мен Қытай жол саласында халықаралық стандарттарды бірлесіп әзірлемек.
