Өскемен жүргізушілеріне «Сергек» арқылы 130 млн теңге айыппұл салынған
ӨСКЕМЕН. ҚазАқпарат – Өскемен қаласында өткен жылы «Сергек» камераларының арқасында 130 млн теңгеден астам айыппұл өндірілді, деп хабарлайды ҚазАқпарат тілшісі.
ШҚО полиция департаменті «Сергек» аппараттық-бағдарламалық кешенінің Өскемендегі 2022 жылғы жұмысының қорытындысымен бөлісті.
«Бір жылдың ішінде қала бойынша 151 323 әкімшілік құқық бұзушылық автоматты түрде тіркелген. Оның ішінде жол қозғалысы ережелерін бұзу фактілері – 135 986. Соның нәтижесінде 130 млн теңгеден астам айыппұл өндірілді», - деп хабарлады департаменттің баспасөз қызметі.
Сонымен қатар аталған кешен камераларының арқасында із-түзсіз жоғалып кеткен 8 адам табылған.
Ведомство дерегінше, 2023 жылы Шығыс Қазақстан облысының тағы екі қаласында «Сергек» камералары орнатылады. Ол – Риддер мен Алтай қалалары.
